Беларусы ўсё часцей выязджаюць за мяжу, і з ростам попыту на візы павялічваецца і колькасць выпадкаў махлярства. Зламыснікі, выдаючы сябе за супрацоўнікаў ці партнёраў VFS Global, падманваюць заяўнікаў, абяцаючы ранні запіс за дадатковую плату, піша БЕЛТА.
Намеснік дырэктара па аперацыйнай дзейнасці VFS Global у Беларусі Вінаяк Прэм Кумар падкрэсліў, што слоты для запісу размяркоўваюцца анлайн на аснове прагнозаў попыту і ўнутранага планавання дыпламатычных місій. Пасля пацверджання запісу заяўнікам рэкамендуецца прыбыць у візавы цэнтр своечасова, каб не прапусціць сваю чаргу.
VFS Global укараніла шэраг мер для барацьбы з махлярствам і павышэння бяспекі:
- уваход у візавыя цэнтры дазволены толькі заяўнікам з пацверджаным запісам;
- для запісу на падачу на візу ў Польшчу ўкарэненая сістэма распазнавання твараў. Жывая выява параўноўваецца з фатаграфіяй у пашпарце, а асабістыя звесткі правяраюцца падчас анлайн-запісу;
- фотаздымак заяўніка прысутнічае ў сістэме запісу і ў пацверджанні запісу, а потым звяраецца з арыгіналам пашпарта ў візавым цэнтры;
- падчас браніравання запісу анлайн выкарыстоўваецца праверка IP-адрасу, каб пераканацца, што адна і тая ж прылада ўжываецца як для верыфікацыі асобы, так і для доступу да запісу;
- для запісу на падачу на візу ствараецца ўнікальны ўліковы запіс па нумары пашпарта;
- для ідэнтыфікацыі карыстальніка і абмежавання ўмяшання агентаў патрабуецца аднаразовы пароль, які адпраўляецца на электронную пошту заяўніку.
VFS Global не прымае рашэнняў наконт візаў — кампанія займаецца толькі адміністрацыйнай апрацоўкай заявак і зборам дакументаў, а ўсе рашэнні пра выдачу візаў прымаюцца амбасадамі і консульствамі.
Акрамя таго, кампанія не кантралюе даступнасці слотаў запісу: іх колькасць рэгулюецца дыпламатычнымі місіямі і залежыць ад загрузкі. Слоты адкрываюцца па меры магчымасцяў консульстваў і размяркоўваюцца паводле прынцыпу чарговасці.
Тэрміны апрацоўкі залежаць ад краіны, у якую афармляецца віза, прычым дадатковыя паслугі (напрыклад, Prime Time — падача ў непрыёмныя гадзіны) не ўплываюць на хуткасць разгляду.
Падаваць дакументы на візы рэкамендуецца загадзя, асабліва ў пікавы сезон. У большасці краін падача заявак магчымая за шэсць месяцаў да паездкі.
Памылкі ці няпоўныя дакументы — самая частая прычына адмовы. Перад падачай заяўнікі павінныя старанна правяраць спіс неабходных дакументаў на сайце www.vfsglobal.com. Кожная краіна мае свае патрабаванні да дакументаў, а іх адсутнасць ці неадпаведнасць можа прывесці да адмовы.
Каб пазбегнуць памылак, можна скарыстацца платнай паслугай дапамогі ў запаўненні анкеты, але гэтая паслуга неабавязковая.
Многія ашуканцы выдаюць сябе за прадстаўнікоў VFS Global, аднак кампанія не супрацоўнічае з пасярэднікамі. Калі нехта прапануе паслугі ад імені VFS Global, варта неадкладна спыніць з імі зносіны.
Разам з тым VFS Global супрацоўнічае з турагенцтвамі для павышэння дасведчанасці заяўнікаў і недапушчэння махлярства.
У той жа час кампанія ніколі не просіць пра плацяжы ці персанальныя звесткі праз сацсеткі і заклікае выкарыстоўваць толькі афіцыйныя каналы для падачы візавых заяваў.
Кампанія VFS Global пачала сваю дзейнасць у Беларусі ў 2013 годзе і цяпер абслугоўвае наступныя дыпламатычныя місіі: Аўстрыя, Нарвегія, Украіна, Ірландыя, Чэхія, Грэцыя, Эстонія, Венгрыя, Данія, Харватыя, Літва, Вялікабрытанія, Фінляндыя, Польшча, Дамініканская Рэспубліка, Латвія, Мальта, Балгарыя, Ісландыя.