Нядаўна адбыўшая «суткі» былая дэпутатка Палаты прадстаўнікоў і экс-кіраўніца ліквідаванага Таварыства беларускай мовы распавяла «Народнай Волі» пра тое, якую мае пенсію, пра сёняшняе жыццё і нежаданне з’язджаць з Беларусі.
Алену Анісім 17 мая затрымалі на працоўным месцы. Па версіі міліцыянераў, яна «агрэсіўна сябе паводзіла ў РАУС». За гэта была асуджана да адміністрацыйнага арышту на 12 сутак. Падчас іх адбыцця яе звольнілі з Інстытута мовазнаўства Акадэміі навук, дзе Анісім працавала з 1991 года.
Летам былая дэпутатка не збіраецца кудысьці працаўладкоўвацца, «бо трэба крыху ачуняць, акрыяць, адпачыць». З верасня плануе шукаць падпрацоўку: «Нейкія мінімальныя грашовыя сродкі ў выглядзе пенсіі я ўсё-такі маю, таму летам магу сабе дазволіць не працаваць».
Прычым пенсія ў Анісім не дэпутацкая. Таму што ў яе кадэнцыю Палата прадстаўнікоў закончыла працу датэрмінова — не набралося неабходных па заканадаўству 5 гадоў на выбарнай пасадзе.
«Такім чынам, пенсія мне была прызначана згодна з маім працоўным стажам. А стаж у мяне — больш за 40 з нечым гадоў, таму маю нават званне „Ветэран працы“. Праўда, на памер пенсіі гэтае званне практычна не паўплывала», — распавяла Анісім.
Зараз у яе пенсія 742 рублі: «Заплаціш камунальныя, купіш нешта паесці, а на што большае, то ўжо і не разгонішся. Таму летам адпачну, а восенню буду шукаць нейкую працу, бо дадатковая капейка не пашкодзіць».
Адказала Анісім і на пытанне аб тым, ці не збіраецца з’язджаць: «Усё сваё жыццё я пражыла ў Беларусі і, нават калі ў санаторый з’язджаю, то дзесяць дзён вытрымліваю са скрыпам. Мае думкі толькі тут, маё жыццё таксама тут. Як бы ні было, я застануся ў Беларусі».