Жонка расійскага палітвязня Аляксея Навальнага Юлія пракаментавала інфармацыю пра яго смерць у калоніі падчас свайго выступу на Мюнхенскай канферэнцыі па бяспецы. Пра гібель сына выказалася і яго маці.
«Я не ведаю, верыць ці не тым жахлівым навінам, якія мы атрымліваем толькі з дзяржаўных крыніц у Расіі. Доўгія гады мы не можам верыць Пуціну і пуцінскаму ўраду, яны заўсёды хлусяць», — прызналася Юлія Навальная.
Паводле яе словаў, калі гэтая інфармацыя пацвердзіцца, то Пуцін і ягонае асяроддзе «панясуць адказнасць», прычым «вельмі хутка».
«Але калі гэта праўда, я хачу, каб Пуцін, усё ягонае асяроддзе, ягоныя сябры ведалі, што яны панясуць за тое, што яны зрабілі з нашай краінай, з маёй сям’ёй, з маім мужам, адказнасць. І гэты дзень наступіць вельмі хутка. І я хачу заклікаць усю сусветную супольнасць, людзей ва ўсім свеце, каб мы разам з’ядналіся і перамаглі гэтае зло, перамаглі жахлівы рэжым у Расіі. І гэты рэжым, і Уладзімір Пуцін мусяць панесці персанальную адказнасць за тое, што яны зрабілі з нашай краінай у апошнія гады», — заявіла Юлія Навальная.
Тым часам маці палітвязня Людміла пракаментавала навіны пра ягоную смерць на сваёй старонцы ў Facebook.
«Не хачу чуць ніякіх спачуванняў. Бачылі сына ў калоніі 12-га, былі на спатканні. Быў жывы, здаровы, жыццярадасны», — напісала яна, яе словы прыводзіць «Новая газета».
Нагадаем, што навіна пра смерць Навальнага з’явілася ў пятніцу, 16 лютага, калі сусветныя лідары сабраліся на канферэнцыі па бяспецы ў нямецкім Мюнхене. Дзяржсакратар ЗША Энтані Блінкен ужо сустрэўся з Юліяй Навальнай і «выказаў спачуванні». Дарадца па нацыянальнай бяспецы ЗША Джэйк Саліван агучыў першы адказ адміністрацыі Байдэна на паведамленні пра тое, што лідар расійскай апазіцыі Аляксей Навальны памёр у расійскай турме. Паводле яго словаў, ЗША працуюць над пацверджаннем гэтай інфармацыі.
Раней, у 2021 годзе, прэзідэнт ЗША Джо Байдэн папярэджваў Уладзіміра Пуціна пра «разбуральныя» наступствы для Расіі, калі Навальны памрэ ў турме. Праўда, тады ён не ўдакладніў, якія менавіта дзеянні ён распачне.